Divina providente clementia, hominibus concessum est ut ex rebus terrenis quas jure possident, si eas, ut dignum est, juste dispertiant, æterna et sine fine mansura premia valeant adipisci. Quapropter ego Rothardus, quamvis indignus sacerdos, dono Deo et sanctis apostolis ejus Petro et Paulo, et ad locum Cluniacum, aliquid ex rebus meis quæ sunt site in pago Arvernico, in villa Gimtiaco: hoc est curtilus unus indominicatus cum omnibus suis appenditiis, campis scilicet et vineis, vircariis, cultum et incultum, totum ad integrum; et terminat ipse curtilus a mane terra contalis, a medio die via publica, a sero terra contalis, a cercio similiter. Infra istas terminationes, meam partem, quæ mihi jure [hereditario] obvenit usque ad inquirendum, ad jam denominatum locum trado atque transfundo, eo tenore ut, quandiu vixero, teneam et possideam, et in vestitura de ipso alodo vineam et vircariam quæ desuper viam est in presenti concedo; et terminat a mane terra contalis, a medio die de ipsa hereditate, a sero terra Bernardi, a cercio via publica. Infra istas terminaciones, totum ad integrum dono, et post finem vitæ meæ, he res denominate ad prefatum locum deveniant. Si quis autem hujus donationis cartam sindere vel calumniare voluerit, primitus iram Dei omnipotentis et sanctorum apostolorum incurrat, sitque pars ejus cum Datan et Abiron, et cum Juda traditore Domini, [nisi emendaverit]; cogente etiam potestate, auri libras V persolvat, et inantea firma et stabilis permaneat, stipulatione subnixa. Actum Anberta publice. S. Rothardi, presbiteri, qui fieri et firmare rogavit. S. Arnulfi. S. Guntardi, qui fidem fecerunt et firmaverunt. S. Giraldi. S. Floaldi. S. Archimbaldi. S. Otgerii. S. Richardi. Data mense maio, anno XXX Hlotharii regis. Rothardus, ad vicem cancellarii, recognovit. Hec omnia pro animæ meæ remedio dono et patris mei Girberti et matris meæ Anastasiæ atque fratris mei Gausberti.